A voceira do PP na Deputación de Lugo, Elena Candia, confirmou esta mañá a existencia dun “acordo” co presidente Darío Campos para aprobar as contas do ente provincial. Candia sinalou esta mañá que ten “plena confianza no compromiso adquirido”, polo que o documento de orzamentos sairía adiante grazas aos votos de populares e socialistas.
Deste xeito, as contas poderían quedar finalmente aprobadas no pleno extraordinario que Campos convocou o luns ás dez da mañá. O presidente decidiu onte a última hora adiar a sesión plenaria inicialmente convocada para hoxe ás doce e media co fin de buscar tamén o voto favorable dos deputados provinciais do BNG.
O voceiro do PSOE na Deputación, Álvaro Santos, confirmaba que Campos tomou a decisión de aprazar o pleno co fin de acadar “o maior consenso posible” e dado que quedan “matices insignificantes de redacción” para plasmar os acordos acadados.
