O Partido Popular denuncia a “falta de vontade” do Goberno provincial para aceptar propostas da oposición “por máis importantes que poidan ser para os intereses dos concellos lucenses”. Así o dixo o voceiro provincial, Javier Castiñeira quen sinalou que na sesión plenaria que tivo lugar onte, o seu grupo presentou unha moción de urxencia para que a Deputación axude aos concellos a xestionar o novo colector de lixo, o marrón, que se dedicará a recollida de residuos orgánicos. “Non admitiron a urxencia e desa maneira evitaron o debate deste asunto”.
A recollida do lixo é competencia propia municipal, pero, segundo explica Castiñeira, a Xunta lanzou unha liña de axudas para colaborar cos concellos na implantación deste novo contedor. “Nós queriamos que a Deputación de Lugo, cumprindo coa súa función de cooperación cos concellos, especialmente cos máis pequenos, axudara nesa xestión”.
O voceiro popular destaca, asemade, que socialistas e nacionalistas negáronse a admitir a urxercia desa moción malia que moitos concellos están xa elaborando a súa estratexia de recollida. Para Castiñeira e o seu grupo, esta negativa “foi unha peza máis na liña deste pleno, dedicado, porque así o impón o goberno provincial, a debater asuntos da Xunta de Galicia e a facer oposición ao goberno autonómico”.
Castiñeira indica que “cando se tratan no pleno asuntos que entran plenamente nas competencias da Deputación como son as estradas provinciais e aumentar a cooperación cos concellos, Tomé di non, que non hai cartos; neste caso, non quixeron nin debater o asunto, o cal é grave”.
Os populares din que no pleno quedou claro que “os municipios da provincia non poden contar co apoio da Deputación na xestión do contedor marrón, algo que entendemos que é necesario e obrigado para unha institución que ten como competencia principal a cooperación cos concellos pequenos”.
