O Concello, dende a área de Medio Rural que dirixe Miguel Fernández, continúa dende hoxe os traballos de rexeneración e mellora das estradas municipais logo de que estes labores quedaran interrompidos a mediados do mes de marzo polo decreto do Estado de Alarma.
Esta mesma mañá daba comezo a execución do asfaltado con aglomerado en quente da estrada que une Cacabelos con Mazoi, nesta mesma parroquia. Unha obra que supón un investimento de 29.000 euros e que será financiada con cargo ao Plan Único da Deputación.
Os traballos consistirán na limpeza das beirarruas e cunetas, no arranxo do firme, asi como na construción de plataformas para a colocación de colectores do lixo.
A esta actuación seguirán, en vindeiras datas, outras xa adxudicadas e que se contemplan tanto dentro do convenio de colaboración provincial como ao abeiro do suplemento de crédito incorporado aos orzamentos do Concello de Lugo.
