A intervención realizouse nunha zona de xogos de 18,21 por 12,10 metros que presentaba un estado de deterioro e que, segundo informou o Concello, era a única do casco urbano que mantiña un pavimento de area.
As actuacións consistiron na substitución do firme por un pavimento continuo de caucho de cores, a instalación dunha valla metálica perimetral para mellorar a seguridade e a renovación dos tres elementos de xogo existentes.
Durante a visita, a rexedora indicou que este tipo de actuacións forman parte das tarefas de conservación e mantemento dos espazos públicos municipais. Segundo sinalou, o Executivo local pretende compatibilizar estas intervencións co desenvolvemento doutros proxectos de maior alcance para a cidade.
Neste contexto, Candia lembrou que o Concello continúa traballando noutras actuacións previstas, entre elas o plan de mellora do Parque de Frigsa, incluído no proxecto Novo Norte, que conta cun investimento previsto de 300.000 euros.
A renovación da área infantil de Xosé Castiñeira busca mellorar as condicións de uso deste espazo de lecer, reforzando a súa seguridade e adaptándoo ás características doutros parques infantís do municipio.
