Dúas persoas resultaron feridas esta mañá nun choque no que se viron implicados un turismo e unha furgoneta en Xove.
Segundo os datos facilitados polos Bombeiros de Viveiro, os membros do Servizo de Prevención, Extinción de Incendios e Salvamento empregaron o material de excarceración para liberar ás dúas persoas accidentadas, que viaxaban unha no coche e a outra na furgoneta.
O sinistro produciuse preto das 8:30 horas no lugar de Castelo, na parroquia de Xuances.
O 112 Galicia tivo coñecemento do choque a través dos servizos sanitarios e, decontado, o persoal do CIAE 112 Galicia solicitou a intervención dos Bombeiros de Viveiro, da Garda Civil de Tráfico, da Agrupación de Voluntarios de Protección Civil da localidade e do GES de Cervo.
Segundo se lle indicou ao 112 Galicia, unha vez liberadas e accesibles, as persoas accidentadas foron trasladadas a un centro hospitalario polo persoal médico.
