Un accidente de tráfico rexistrado esta madrugada en Antas de Ulla sáldase cunha vítima mortal e outra ferida. O seu vehículo saíuse da vía cando circulaban pola N-640, a estrada que conecta Agolada con Antas de Ulla, preto de Castro de Amarante.
A vítima, un mozo de 23 anos, tivo que ser excarcerada do interior do coche polos efectivos de emerxencia. A outra persoa ferida puido abandonar o vehículo polos seus propios medios.
O 112 Galicia tivo coñecemento do sinistro ás 3:05 horas desta madrugada, a través dunha alerta do 061-Urxencias Sanitarias. Acto seguido, o persoal do Centro Integrado de Atención ás Emerxencias alertou aos Bombeiros de Chantada, ao GES de Monterroso e á Garda Civil de Tráfico.
