A Xunta de Goberno Local aprobou tamén 25.000 euros en axudas para proxectos de igualdade e diversidade, así como o cambio de titularidade dun posto do Mercado Municipal
A Xunta de Goberno Local de Lugo deu luz verde este luns a varias actuacións en materia de infraestruturas rurais, seguridade, políticas sociais e organización municipal. Entre as principais decisións figuran a licitación das obras de acceso a tres núcleos rurais e a adxudicación, por preto de medio millón de euros, do alugueiro durante cinco anos de seis vehículos para a Policía Local.
O Goberno municipal aprobou o proxecto e o expediente de contratación para mellorar os accesos a Trasfontao e Pollido, na parroquia de Coeses, e a Ribadelo, en Ribas de Miño. A actuación tramitarase mediante un procedemento aberto simplificado e terá un orzamento máximo de 122.481,22 euros, IVE incluído.
As obras forman parte do Plan de Actuacións en Camiños Rurais 2026-2027. Do custo previsto, 102.630 euros procederán dunha axuda da Xunta de Galicia cofinanciada con fondos europeos FEADER. A achega restante, próxima aos 20.000 euros, deberá ser asumida polo Concello.
Renting para seis vehículos por 496.438 euros
A Xunta de Goberno adxudicou tamén á empresa Autos Iglesias, S.L. o contrato de alugueiro —renting— de seis novos vehículos patrulla por 496.438,80 euros, IVE incluído. O contrato terá unha duración de 60 meses, o que supón un custo medio próximo aos 1.379 euros mensuais por vehículo.
A frota estará composta por seis Renault Austral Techno Full Hybrid E-Tech 200. Cinco deles incorporarán equipamento para o traslado de persoas detidas, mentres que o sexto non contará con este dispositivo.
Segundo a oferta adxudicataria, os coches deberán entregarse nun prazo de catro días naturais desde a formalización do contrato. A empresa ofreceu ademais ampliar en 30.000 quilómetros anuais o límite inicialmente previsto de 40.000, polo que cada vehículo poderá percorrer ata 70.000 quilómetros ao ano.
O Concello sinala que a adxudicación permite regularizar un servizo cuxo contrato estaba caducado desde abril e evitar que continúen os pagos sometidos a reparos da intervención municipal.
Axudas para igualdade e diversidade
O órgano municipal aprobou igualmente unha convocatoria de subvencións, dotada con 25.000 euros, para asociacións e entidades privadas sen ánimo de lucro que desenvolvan proxectos de interese social.
A convocatoria distribuirase en dúas liñas. A primeira apoiará iniciativas relacionadas coa igualdade de xénero, a integración das mulleres, a prevención das violencias machistas e a participación das mulleres do rural. A segunda financiará actividades de sensibilización e visibilización das persoas LGTBIQ+, promoción de dereitos, inclusión, orientación e asesoramento.
Cociña tradicional india no Mercado Municipal
A sesión autorizou, por outra banda, o cambio de titularidade do posto número 26 do Mercado Municipal de Quiroga Ballesteros debido á xubilación da actual concesionaria.
A nova concesión corresponderá a Aakash Tufchi, que proxecta abrir un establecemento de restauración especializado en cociña tradicional india, en particular na gastronomía de Delhi. Non se informou da data prevista para o inicio da actividade.
Cobertura temporal en Educación
No ámbito da organización interna, o Concello propón nomear a María del Carmen Carlín Arias para ocupar temporalmente a Xefatura do Servizo de Educación mediante unha comisión de servizos.
A cobertura terá unha duración máxima inicial dun ano e poderá prorrogarse por outro se a praza non queda cuberta de maneira definitiva.
