A xornalista e escritora Sonsoles Ónega e a presidenta da Audiencia Provincial de Lugo, Sandra María Piñeiro Vilas, protagonizarán dous dos actos centrais do San Froilán 2026.
Ónega pronunciará o pregón o domingo 4 de outubro, ás 12.00 horas. Actualmente presenta Y ahora Sonsoles en Antena 3 e en 2023 gañou o Premio Planeta coa novela Las hijas de la criada. A súa relación con Lugo é familiar: é filla do xornalista Fernando Ónega, natural de Mosteiro, no concello de Pol. Ademais, en 2015 foi pregoeira da Semana Santa lucense.
Pola súa banda, Sandra Piñeiro realizará a tradicional ofrenda a Rosalía de Castro o domingo 11 de outubro, Domingo das Mozas, tamén ás 12.00 horas. A maxistrada exerceu desde 2012 como titular do Xulgado de Instrución número 2 de Lugo e foi nomeada presidenta da Audiencia Provincial en xuño de 2025.
O Concello destaca a vinculación persoal e profesional de ambas as dúas protagonistas coa cidade. O pregón e a ofrenda a Rosalía volverán formar parte dos actos máis simbólicos das festas lucenses.
