Lugonovo denuncia que as axudas de emerxencia concedidas polo Concello, sempre exentas de tributación, están constando como ganancias patrimoniais por un erro na súa tramitación.
A concelleira da formación, Cristina Pérez Herráiz, alertaba de que a consecuencia deste erro “a gran maioría dos perceptores deben facer a declaración da renda” ao constar que teñen máis dun pagador. Como os perceptores descoñecen esta circunstancia, non presentan a declaración, algo que está a ocasionar sancións posteriores por parte da Axencia Tributaria. Ademais, a concelleira alerta de que ao constar que teñen obrigas pendentes con este organismo, “paralízaselles tamén a concensión doutras subvencións que lles corresponden”.
“O que acontece é que o Concello está a trasladar mal os datos das achegas municipais ao ente estatal, de maneira que estas figuran, erróneamente, como ganancia patrimonial e forzan a súa declaración. A irregularidade detéctase cando os usuarios van tramitar outras prestacións, porque no seu expediente figura que teñen unha obriga sen resolver coa administración”, subliña.
“ Cómpre ter en conta que cando calquera destas persoas solicita o subsidio por desemprego, ou algún tipo de bolsa; de entrada, todas elas lle son paralizadas por non estar ao día con Facenda. E o agravio é dobre porque ao chegar á Axencia Tributaria, para arranxalo, son sancionadas por non ter presentado a renda en tempo. O camiño que deben percorrer despois constitúeno un sen fin de tramites, voltas e solicitudes de certificados ata descubrir de onde sae ese concepto financeiro”, resume.
Dende a formación, consideran urxente que o executivo emende a situación e compareza para dar as explicacións oportunas, artellando ademais os mecanismos precisos entrámbalas dúas institucións para evitar que volva suceder.
