A alcaldesa de Lugo, Lara Méndez, defendeu esta mañá a actuación dos bombeiros no incendio que se rexistrou esta fin de semana nun posto de comida rápida situado no recinto feiral do San Froilán. Segundo a rexedora, os efectivos chegaron nun tempo “razoable”, que cifrou en 13 minutos no caso dos bombeiros e 8 minutos no caso da Policía local.
Ademais, Méndez tamén aludiu ao feito de que o incendio se rexistrase nun cambio de quenda dos efectivos de extinción. “Ás veces tamén coinciden cambios de horario e é unha situación que se dá de forma excepcional. Evidentemente cando hai unha desgraza os minutos poden facerse eternos e todo o tempo que se dilate non é bo nin aconsellable, pero no feiral sempre hai un camión de bombeiros de retén e ao mellor coincidiu que estaban nun cambio de quenda”, sinalou a rexedora.
Con todo, Lara Méndez, volveu considerar que se acudira ao lugar dos feitos nunha marxe razoable tendo en conta a masiva afluencia de xente na xornada do domingo.
