Morre unha muller a causa da intensa chuvia que caeu en Viveiro

Unha muller faleceu a pasada noite nunha vivenda da rúa Xunqueira, en Viveiro, a causa da chuvia intensa e súbita que provocou o desbordamento do Río en Ponte Labrada. Ademais, a filla da muller falecida foi trasladada con síntomas de hipotermia a un centro hospitalario.

A forte tromba de auga provocou que moitas casas, garaxes e baixos comerciais se visen afectados, o que condicionou a intervención dos servizos de emerxencias debido ás dificultades para acceder ás vivendas e comprobar o estado das persoas.  De feito, dadas as dificultades, os membros do GRUMIR e os Bombeiros de Viveiro tiveron que abrir unha claraboia e descolgarse para acceder á vivenda onde foron atopadas a muller falecida e a súa filla.

Cabe destacar que no CIAE-112 xestionáronse unha vintena de incidencias relacionadas coas intensas choivas que afectaron ao termo municipal lucense de Viveiro e atendéronse unhas trinta chamadas de particulares. Unha das zonas máis afectadas foi a do convento de Valdeflores, concretamente na rúa Real, desde onde se recibiron alertas por xente illada nas vivendas.

Así, desde o 112 Galicia activouse un operativo no participaron os Bombeiros de Viveiro e de Barreiros, o GRUMIR, a Policía Local e Nacional e as Agrupacións de Voluntarios de Protección Civil de Viveiro, O Vicedo e Ourol.

Novas relacionadas

Deixar unha resposta

A súa dirección de email non será publicada. Os campos requeridos están marcados *

Este sitio emprega Akismet para reducir o spam. Aprende como se procesan os datos dos teus comentarios.


Diario de información xeral sobre Lugo e a súa provincia
San Salvador de Muxa 124 27192, Lugo