O Concello de Trabada prepara, por segundo ano consecutivo a súa Festa Gastronómica da Enfariñada, unha cita na que a música, a artesanía e a gastronomía se integrarán nunha mesma celebración para o goce de todos os visitantes.
A xornada terá lugar o vindeiro domingo, 5 de maio, na praza do Concello. O recinto acollerá pola mañá, dende as 12.00 horas unha demostración de restauración-torno, da man de Vicente Ledo que irá seguida da actuación do Cuarteto Tradicional Illa Pancha.
Ás 13.30 horas, os asistentes poderán percorrer o Mercado de produtos Locais de Artesanía amenizado por Airiños da Freba, asemade, ese é o momento no que se empezará a gozar do produto estrela: a Enfariñada. Pola tarde, a partir das 16.30 horas, chegará o momento da actuación da gaiteira internacional Susana Seivane.
Despois do éxito da primeira edición, prevese que centos de persoas asistan a esta nova edición da Festa da Enfariñada de Trabada, convertindo desta maneira á cita gastro-cultural nun referente da Mariña Lucense e de toda a provincia de Lugo. En definitiva, un acontecemento gastronómico e cultural para toda a familia no que o prato típico de Trabada, a Enfariñada, se convertirá no elemento central en torno ó que confluirán a música e a artesanía.
