Lugo celebrou este sábado o Día do Veciño 2021

Este sábado celebrouse o Día do Veciño 2021, organizado pola Federación de Asociacións de Veciños, unha das entidades máis numerosas de Galicia, que integra a máis de 200 asociacións que simbolizan tanto a realidade do Lugo urbano como do rural.

O evento, que regresou ao Pazo de Feiras e Congresos, logo de que o pasado ano non se puidera celebrar a causa da pandemia, tivo un formato reducido reunindo a máis dun milleiro de persoas, polas máis de 4.000 que participaron na última edición.

O programa deu comezo entorno ás 10.30 h., e incluíu unha exposición das actividades levadas a cabo pola Federación de Veciños durante este ano, a celebración dun partido de fútbol entre veciños no Polvorín e actuacións de música tradicional, como a da ‘Asociación cultural Axóuxere de Roupar’. Ritmo Lugo realizou unha actuación de baile e para finalizar procedeuse á entrega das V do Veciño, premios cos que se homenaxea e se recoñece a labor de personalidades que destacaran pola súa colaboración co movemento veciñal.

Nesta edición, marcada pola pandemia, non puido celebrarse o xantar habitual, mais en substitución do mesmo os convidados recibiron unha cesta con productos con denominación de orixe e a camiseta do Día do Veciño.

O TSXG autoriza á Xunta esixir o certificado COVID-19 en todos os locais de lecer nocturno

O Tribunal Superior de Xustiza de Galicia (TSXG) autorizou á Xunta esixir a presentación do certificado COVID-19 de vacinación, recuperación ou proba diagnóstica negativa para acceder a todos os locais de lecer nocturno da comunidade autónoma porque contarán, a partir de hoxe, cun aforo do 100 %. Ata o de agora, só tiñan a obriga de requirir o certificado os locais que abrisen ata as catro da mañá e contasen con capacidade do 75 %, en interior, e do 100 %, en exterior. A ampliación de capacidade, segundo indica o alto tribunal, supón “un maior de risco”.

“A medida que se trae para a súa autorización, non é nova, senón de maior alcance, e tampouco é de aplicación xeral ou indiscriminada, senón que se dirixe a unha soa actividade: o lecer nocturno”, salientan os maxistrados. Para autorizar a medida restritiva de dereitos fundamentais, a sección terceira da Sala do Contencioso-administrativo tivo en conta un informe técnico do pasado 19 de outubro, que advirte que a melloría da situación epidemiolóxica na comunidade non evita “a persistencia da circulación do virus e, por conseguinte, o risco da súa transmisión, especialmente nos establecementos de lecer nocturno, que se frecuentan por mozos, colectivo que, ademais, é o que presenta menor cobertura na vacinación”.

Os xuíces tamén destacan que a actividade na que se aplica a medida se desenvolve en espazos “nos que resulta dificultoso renovar o aire de forma natural, coa consecuente facilidade de que se transmita o virus por vía aérea, segundo acredítase nos rigorosos estudos científicos aos que se refire o informe do 19 de outubro”. Por iso, consideran que é “evidente” a utilidade da medida de prevención, “que non ten como finalidade o mero control aos clientes, senón a de impedir que accedan aos establecementos as persoas que non acrediten o cumprimento dos requisitos que perseguen os certificados de vacinación, recuperación e de probas diagnósticas da COVID-19”. Os xuíces, por tanto, conclúen que é unha medida “idónea, necesaria e proporcionada”.

Presentación da exposición: 50 anos do Belén de Begonte

Na sala de exposicións da Delegación territorial da Xunta de Galicia en Lugo vén de presentarse a mostra 50 ANOS DO BELÉN DE
BEGONTE (1972-2022), proxectada polo Colectivo Egeria e o Centro Cultural José Domínguez Guizán (impulsor do Belén de Begonte), e que resume a vida e actividade deste Belén electrónico que a Xunta declarou en 2014 “de interese turístico galego”.

A exposición, apoiada pola Xunta de Galicia e o Concello de Begonte, foi presentada polo Delegado Territorial da Xunta en Lugo, Javier Arias Fouz; a Xefa provincial de Cultura, María José Gómez Rodríguez; o Alcalde de Begonte, José Ulla Rocha, e o Presidente do Colectivo Egeria e vicepresidente do Centro cultural begontino, Xulio Xiz. Estaban acompañados pola familia de José Rodríguez Varela, creador do Belén: a viúva, Pilar Gómez e os fillos Pilar e José Rodríguez Gómez, e o membro do xurado do Certame de Arte, Gonzalo Sánchez Folgueira, Zalo.

Entre os numerosos asistentes estaban fotógrafos do Grupo Fonmiñá, colaboradores na exposición, directivos de diversas asociacións culturais e sociais, premiados nos certames de arte, poesía e xornalismo, e persoas colaboradoras e amigas do Belén begontino.

A Xunta instala o novo sistema de contención da fauna na vía de altas prestancións CG 2.2 á altura do Corgo

A Consellería de Infraestruturas e Mobilidade está a instalar o novo peche de seguridade na vía de altas prestacións Lugo-Monforte (CG-2.2) ao seu paso polo Corgo, un modelo piloto de contención da fauna que se ensaiará simultaneamente neste tramo e na AG-64, en Narón.
Conta cun orzamento conxunto de preto de 353.000 euros.

O delegado territorial da Xunta en Lugo, Javier Arias, comprobou hoxe a marcha dos traballos, que entran na recta final coa colocación dunha malla de 1,5 metros de altura libre sobre o terreo para evitar a entrada de animais domésticos e fauna salvaxe. Ademais, a actuación recolle a adaptación do chan cunha tensión de valla superior aos 1.000 quilos de arrastre para a contención dos xabarís.

Arias explicou que as obras desenvólvense no tramo que vai do punto quilométrico 9 ao 11 e estarán rematadas no prazo aproximado de dous meses. Nos ramais de enlace -onde se interrompe o valado de malla- colócanse pasos antifauna que disuadan aos animais de acceder á vía, e para facilitar a saída daqueles que consigan entrar habilítanse rampas que permitan saltar ao exterior.

O delegado territorial sinalou que esta iniciativa enmárcase nas medidas específicas que está a poñer en marcha a Consellería de Infraestruturas para evitar os accidentes causados pola irrupción do xabaril nas estradas. Neste sentido, subliñou que a autovía Nadela-Sarria, cuxa primeira fase se executa entre A Pobra de San Xiao e Sarria, tamén contará con valla reforzada en ambos os lados para reducir estes

A Deputación aproba a convocatoria para adxudicar os hortos urbanos do Rato

A Xunta de Goberno da Deputación de Lugo aprobou este venres a convocatoria para adxudicar os 41 hortos urbanos da institución provincial que quedan dispoñibles no Río Rato.

Así o anunciou o Deputado de Promoción Económica e Social, Pablo Rivera Capón, tras a sesión semanal no Pazo de San Marcos. Con este novo lote de parcelas quedarán adxudicadas as 150 que están habilitadas no Rato, posto que xa hai adxudicadas outras 109.

“Poderán presentar solicitude todas as asociacións ou persoas maiores de idade, con residencia na provincia, que non convivan con beneficiarios doutros hortos ou que non posúan terreos no concello de Lugo con potencialidade de ser cultivados”, explicou Rivera Capón, que detallou que no caso de que o número de solicitudes sexa superior ao de hortos dispoñibles, procederase a unha valoración previa.

No caso de persoas físicas, terán prioridade para solicitar calquera destas 41 parcelas, as persoas desempregadas, aquelas cunha renta per cápita menor, familias numerosas ou xubilados. No caso dos colectivos, terán prioridade aqueles sen ánimo de lucro ou representantes de centros educativos.

Os interesados poderán presentar a documentación no Rexistro da Deputación de Lugo ou na Sede Electrónica da institución durante un prazo de 10 días, que se abrirá ao día seguinte da publicación desta convocatoria no Boletín Oficial da Provincia (BOP). As autorizacións de uso outorgaranse con carácter gratuíto e por un prazo de dous anos, con posibilidade de prórroga.

A Xunta de Goberno aprobou tamén diferentes colaboracións cos concellos da provincia por un importe conxunto superior aos 100.000€ para ampliar, mellorar ou manter os servizos públicos que ofrecen á veciñanza. Neste sentido, Pablo Rivera deu conta da aprobación dun convenio de colaboración co Concello de Guitiriz para ampliar o centro de día municipal por un importe total de 71.825€, dos que a Deputación achegará 50.000€, o que supón o 70%. Un investimento que servirá para incrementar as prazas do centro chairego ata chegar, das 12 coas que conta na actualidade, a 20.

Tamén quedou aprobada a colaboración da Deputación co Concello de Viveiro, cunha achega de 35.000€ para a instalación do tradicional Belén Xigante, un nacemento a tamaño natural que se instala no entorno da igrexa de Santa María e fronte ao convento das Dominicas, no centro histórico da cidade do Cabe, e que este Nadal está previsto ampliar ata a Praza da Fontenova e a rúa Teodoro Quirós.

Cs urxe ao Goberno local a presentar a nova ordenanza de contaminación acústica

A portavoz do grupo municipal de Cs, Olga Louzao, criticou esta mañá a inacción do Goberno local en relación á elaboración da nova ordenanza de contaminación acústica, paralizada desde a chegada de Lara Méndez á alcaldía. “Máis de dúas décadas despois e a pesar do crecemento urbanístico que experimentou a nosa cidade, Lugo segue tendo o mesmo mapa de ruídos urbanos e a mesma normativa que rexe a apertura de establecementos de hostalería ou de industrias que xeran contaminación acústica. É un clamor social que a normativa debe estar actualizada á realidade da nosa urbe e a falta de regulación legal a nivel municipal está a xerar problemas de convivencia. É necesario que a alcaldesa deixe de esconderse e tome cartas neste asunto. Trátase dunha falta de vontade política”, sinalou a concelleira da formación laranxa.

“O 13 de febreiro de 2018 o Goberno local anunciaba aos catro ventos que o mapa de ruído urbano estaba a ser redeseñado. Hoxe, case 4 anos despois nada sabemos do novo texto. Este mes preguntamos na comisión pertinente que avances se produciron neste asunto e a resposta é que todo segue igual. É urxente que Lugo conte cunha ordenanza que se adapte á lexislación estatal e autonómica para poder dotar de seguridade xurídica a apertura de novos establecementos”, sinalou a edila que considera fundamental redeseñar a limitación de apertura de locais en zonas saturadas.

“A actual ordenanza supón ademais un lastre á rehabilitación de edificios en varias zonas da cidade, como o centro histórico ou Recatelo e limita o desenvolvemento urbano pola falta de certeza”, proseguiu.

“É unha auténtica vergoña que a Ordenanza municipal en vigor date do ano 2003. Esta normativa precisa ser adaptada ao Decreto 106/2015 da Xunta de Galicia sobre contaminación acústica e xa deu pé a distintas sentenzas en contra do Concello de Lugo entre outras, pola regulación das consideradas como zonas saturadas. En setembro de 2013 foi aprobada inicialmente a Ordenanza Reguladora de Contaminación Acústica do Concello de Lugo, pero esta quedou bloqueada tras recibir máis de 100 alegacións no prazo de exposición pública. Desde entón non se deu nin un só paso en firme a pesar das numerosas iniciativas presentadas polo noso grupo. Este é o modus oporandi ao que nos ten afeitos Méndez cuxa xestión e as súas desidia polos temas realmente importantes para os veciños ten sumida á cidade nun parálise total”, concluíu.

José Manuel Balseiro, novo coordinador xeral do Partido Popular na provincia

A presidenta provincial dos populares lucenses, Elena Candia, vén de designar a José Manuel Balseiro como novo coordinador xeral do Partido Popular.

Esta nova responsabilidade suma tamén a condición de voceiro da formación popular, así como a súa incorporación con esta función ao Comité Executivo, máximo órgano de dirección do partido na provincia.

A designación do coordinador xeral constitúe unha das novidades sobre as que traballa o PP de Lugo tras o seu congreso do pasado mes de setembro e supón un paso decisivo para afondar na unidade orgánica, conformando un equipo de dirección que une capacidade de traballo, experiencia e renovación.

O deputado autonómico coordinará toda a actividade do partido na provincia a través das vicesecretarías, dos coordinadores territoriais e dos grupos institucionais. Todo o novo equipo de dirección, baixo o liderado de Elena Candia, traballa co obxectivo final para que o Partido Popular siga crecendo e fortalecendo a súa presenza nos municipios da provincia e seguir merecendo a confianza maioritaria das e dos lucenses.

A finalidade da Elena Candia é a de ir incorporando máis xente a este novo e ambicioso proxecto co obxectivo de gobernar o máximo de institucións na provincia.

13,00 h.- O vicepresidente da Xunta, Alfonso Rueda, reunirase cos presidentes das Deputacións da Coruña e Lugo, Valentín González Formoso e Darío Campos, e co deputado de Economía, Facenda e Réxime Interior da Deputación de Pontevedra, Carlos López Font. A reunión terá lugar no Gabinete da Vicepresidencia (Bloque V, 3º andar) foto xon crespo 27/07/17

Fin da Emerxencia Sanitaria en Galicia

Onte o aprobaba o Comité Clínico e hoxe xa é definitivo. Galicia xa non está en estado de Emerxencia Sanitaria logo de ser aprobado onte no Consello da Xunta, que tamén autorizou recuperar o 100% dos aforos, ampliar os horarios en hostalería e lecer nocturno, e as medidas de visitas e saídas das residencias de maiores.

Un debate que tamén se abriu onte é sobre a obriga do uso da máscara en espazos pechados e entre os escolares. Se ben, xusto onte se coñecía que o Tribunal Superior de Xustiza de Galicia rexeitaba o recurso interposto por unha asociación contra o protocolo aprobado pola Xunta para o curso 2020-2021 que obrigaba ao estudantado de centros non universitarios de Galicia a utilizar máscara debido á crise sanitaria, era a propia Xunta quen retiraba, en certos contextos o uso da máscara.

A asociación que recorría o protocolo galego solicitaba aos maxistrados que declarasen que se produciu unha vulneración do dereito á vida, integridade física e moral polos “danos e prexuízos” ocasionados aos menores, fillos dos socios, debido ao uso continuado da máscara nos centros escolares.

O colectivo, no seu recurso contra a resolución do 4 de novembro de 2020, pola que a Consellería de Sanidade e a de Cultura, Educación e Universidade aprobaron a actualización do protocolo COVID-19 para o curso 2020-2021, asegura que a medida do uso de máscara xerou “danos irreversibles e irreparables na saúde dos menores”.

Na sentenza, os xuíces salientan que o TSXG, desde agosto de 2020, “vén reiterando que o uso da máscara é unha medida adoptada nun contexto de emerxencia sanitaria e de eficacia demostrada para a prevención da propagación do virus e para a protección das persoas sas”.

Por iso, tal e como indicou nun auto anterior, considera que “non pode prevalecer o interese particular de quen sofre unha incomodidade no uso da máscara fronte ao interese público, cuxa salvagarda subxace na obriga do seu uso”. Así, considera que a “intervención estatal na liberdade individual” resulta “proporcionada aos fins buscados”, que son “a protección da saúde dos cidadáns e unha protección terapéutica non especialmente invasiva”. O TSXG conclúe na resolución, contra a que cabe presentar recurso, que debe prevalecer “o obxectivo constitucional de protección da saúde de todos”.

Este protocolo, do que vimos falando e que foi recorrido polo colectivo, foi aprobado a mediados de 2020 pola Xunta, amparado polo Estado e o Comité Clínico, para facer fronte ao curso 2020/2021 do que non se sabía moi ben que agardar.

Novas medidas

Así, pouco menos dun ano despois, a Xunta abre o debate no seu seo interno sobre o uso da máscara. Onte, dábanse pasos de mellora. E é que a máscara deixa de ser obrigatoria no deporte federado para os maiores de 12 anos. Cabe destacar que a poboación menor de 12 anos non ten autorizada a vacina contra a covid e, por tanto, non recibiu este medicamento para a imnunización. Así pois, este grupo de idade queda nas pavías no levantamento de medidas que se promoven para os vacinados –por exemplo, o lecer nocturno, con medidas máis flexibles con este certificado–.

A través dun comunicado, a Secretaría Xeral para o Deporte apunta que deberán ser as propias federacións deportivas de Galicia ou os organizadores das probas deportivas os que envíen a proposta de modificación dos seus respectivos protocolos baseados no Fisiocovid- DXTGalego, polo que se establecen as medidas para facer fronte á crise sanitaria ocasionada polo covid-19.

Ademais, a Secretaría Xeral para o Deporte lembra que desde o acordo do 12 de xuño de 2020, sobre as medidas de prevención, a actividade deportiva federada en Galicia estivo permitida e a que a incidencia do covid-19 “é inferior no deporte federado que na poboación en xeral”, como se observou nun estudo realizado en colaboración coas federacións deportivas e a Xunta.

E, neste senso, o vicepresidente primeiro da Xunta, Alfonso Rueda, ratificou onte que o Goberno galego ten pendente a decisión sobre a posible retirada da máscara nos recreos dos centros educativos, un paso que en Madrid –segundo anunciou tamén onte a presidenta, Isabel Díaz Ayuso– darase xa desde este luns 25.

No caso galego, Rueda revelou que se realizará unha consulta, a través dos servizos xurídicos da Xunta, para determinar se retirar a máscara nos recreos é “viable xuridicamente”. “Se é viable xuridicamente, someteríase a decisión do comité clínico”, insistiu Rueda, quen concluíu que serán os expertos sanitarios os que teñan a última palabra.

O presidente da Xunta de Galicia, Alberto Núñez Feijóo, tamén se pronunciou sobre o tema, e ve posible retirar a máscara no recreo dos colexios se os datos de contagios e a lexislación permíteno.

“Está claro que en interiores non o permite e estamos a ver se legalmente hai algunha posibilidade. No caso de que houbese algunha posibilidade legal –entendo que si porque Madrid fíxoo– pasariámolo ao comité clínico de saúde para que nos diga se o considera prudente ou non”, afirmou Feijóo tras o encontro mantido este xoves en Madrid coa vicepresidenta terceira do Goberno, Teresa Ribeira.

Máis alivio

E, ademáis da máscara no deporte federado, que outras cousas cambian a partires de mañá co levantamento da emerxencia sanitaria? Pois ben, a Xunta decidiu recuperar os aforos ao 100% en todas as actividades que aínda non o fixeron, principalmente hostalería e lecer nocturno, nas que se vai a ampliar entre media e unha hora o horario de peche.

Deste xeito, as cafeterías e restaurantes poderán abrir ata as 1:30 as noites dos venres e os sábados; os pubs poderán pechar ás 4:30, tamén as fins de semana, e as discotecas e salas de festa amplían o seu horario ata as 5 horas todos os días da semana, informou o vicepresidente primeiro da Xunta.

Rueda comunicou as novas medidas tras a reunión do Consello de la Xunta, na que tamén se deu o visto e prace a levantar algunhas restricións que quedaban pendentes nas residencias sociosanitarias, de modo que os usuarios poderán saír como antes da pandemia e tamén recibir visitas, aínda que continuará a cita previa.

Alcaldes socialistas denuncian “opacidade” na nova planta de Sogama en Riotorto

Os Alcaldes Socialistas da Pontenova, Darío Campos; Meira, Antonio de Dios; Pastoriza, Primitivo Iglesias; Pol, Lino Rodríguez e Ribeira de Piquín, Roberto Fernández denunciaron a falla de transparencia e a opacidade coa que esta actuando SOGAMA e o Concello de Riotorto, en relación á nova ubicación da planta de transferencia de residuos.

Por iso anuncian que enviarán un escrito á este ente, dependente da Consellería de Medio Ambiente, “para amosar a nosa desconformidade co xeito de proceder deste organismo público xa que non se nos facilitou ningunha información sobre este proxecto. E tamén queremos deixar claro que estamos en desacordo con que Riotorto sexa o núcleo elixido para esta nova planta”.

Os socialistas remarcan que “o mellor emprazamento para esta nova dotación, que ten que dar servizo a todos estes concellos, é o Punto Limpio Serra de Meira en Xuncás (concello de Pastoriza), que xa conta con dotacións de auga, luz e accesos, polo tanto só habería que ampliar as instalacións. E por suposto non afectaría nin as explotacións gandeiras nin a veciñanza da contorna”, sinalan.

“Entendemos que esta nova planta de residuos que dará servizo aos concellos da Pontenova, Meira, Pastoriza, Pol, Ribeira de Piquín e Riotorto, ten que ser máis eficiente, pero segundo comprobamos SOGAMA só busca rédito electoral co emprazamento no Concello de Riotorto. Xa que ao resto de concellos implicados afectaríanos máis este emprazamento de recollida, por mor da distancia e o quilometraxe existente entre os concellos. Ademais hai que lembrar que esta nova construción encarecería considerablemente os custes económicos desta nova dotación, xa que a de Xuncás conta con infraestrutura, e non se parte de cero como en Riotorto”, advirten os rexedores socialistas.

O pasado 27 de setembro a Consellería de Medio Ambiente anunciou na parroquia de Aldurfe en Riotorto, acompañada do Alcalde, Clemente Iglesias, que neste núcleo se ía instalar a nova planta de residuos que dará servizo aos concellos da contorna. Pero trala presión veciñal, que viron como afectaba as súas explotacións gandeiras e incluso as súas vivendas, o Concello de Riotorto e a Xunta recuaron con esta ubicación, e nestes intres están buscando un novo emprazamento para esta nova dotación.

Imaxe de arquivo: Dario Campos e Lino Rodríguez (rexedores da Pontenova e Pol, respectivamente)

Lugo retomará este mes a celebración dos Plenos de xeito presencial

O executivo de Lara Méndez retomará neste vindeiro mes de outubro a celebración presencial dos Plenos logo de que a Xunta de Galicia anunciase a suspensión, este próximo sábado, do estado de emerxencia sanitaria ante a evolución dos contaxios de coronavirus, polo que toda a Comunidade galega quedará en mínimos de restricións.

“Trátase de ir gañando espazos á pandemia, recuperando, pouco a pouco, a normalidade e de ir avanzando naqueles aspectos cotiás do funcionamento do Concello que, podendo desenvolverse con tódalas garantías de seguridade, resultan prioritarios para a cidade. Non debemos esquecer que o Pleno é o máximo órgano de representación política da veciñanza lucense no Goberno local e, polo tanto, sempre que sexa factible, debe favorecerse a súa continuidade”, sinala a rexedora.

Méndez aclarou que a partir de novembro tamén pasarán a realizarse presencialmente as Comisións e Xuntas de Voceiros correspondentes a cada Sesión, “non así este mes, por estar xa convocadas de xeito telemático” e recordou que o Concello de Lugo mantivo, dende abril de 2020, toda a súa actividade orgánica “grazas ao esforzo realizado polo persoal de informática para habilitar os mecanismos necesarios tanto para permitir a realización e retransmisión dos Plenos como para que os empregados do Concello puideran teletraballar dende o minuto un do Estado de Alarma”.

Así pois, o seguinte Pleno ordinario do Concello de Lugo celebrarse o vindeiro 28 de outubro, xa en modalidade presencial aínda que poderá seguirse tamén en streaming a través do enlace que se habilita na páxina web municipal.

Últimas novas

Novas

Imaxe de arquivo: Dario Campos e Lino Rodríguez (rexedores da Pontenova e Pol, respectivamente)