O barrio da Milagrosa acollerá este venres, 30 de xuño, unha masterclass de baile dentro da campaña de dinamización posta en marcha polo Concello. A actividade terá lugar de 21:00 a 00:00 horas, na rúa Mallorca, e estará impartida polo actual campión de España de bailes caribeños, Jandro Pallares, da escola Ritmo Lugo.
O obxectivo desta iniciativa é poñer en valor o bo facer da actividade comercial e hostaleira da Milagrosa, “un barrio emblemático na cidade e cunha veciñanza exemplo de convivencia e confraternidade”, apuntou Lara Méndez, alcaldesa de Lugo. O plan de dinamización, que parte da área de Desenvolvemento Local, quere contribuír a dignificar a calidade tanto da atención que se dispensa, como do produto que se oferta nesta parte da cidade, fronte a outras mensaxes que tratan de asimiliar esta contorna a unha situación permanente de marxinalidade e conflitividade social.
A iniciativa conta ademais cunha mascota propia: a Milagrosiña, que é un dos eixes deste Plan de dinamización. Unha simpática fada cuxo achádego nos establecementos participantes é chave para gañar vales de compra.