O voceiro do BNG – Asembleas Abertas no concello de Lugo, Rubén Arroxo, volveu hoxe a denunciar o mal estado de algunhas das estruturas de madeira situadas no paseo do Miño e do río Rato. Arroxo dixo que “ademais de facer o mantemento necesario nos camiños e no seu entorno hai que acometer o arranxo das estruturas de madeira”. Rubén Arroxo sinalou que, nalgúns casos, haberá que substituír algunhas destas infraestruturas xa que, ou ben desapareceron ou, o seu estado non permite o arranxo.
No mes de abril o BNG-AA xa presentara un escrito solicitando o amaño das pasarelas danadas. “Se ben é certo que en algunhas interviuse hai outras que continúan inservibles” dixo Arroxo e engadiu que “non entendemos por que non se fai unha actuación periódica de mantemento que sirva para que este espazo se poida utilizar na súa totalidade”.
Rubén Arroxo dixo que “estamos en agosto e incrementouse o número de persoas usuarias destes espazos de lecer e débense poñer a punto as infraestruturas que se estragaron”. “Hai pontes que despareceron coas cheas do río e que deixaron camiños incomunicados, noutros casos trátase de arranxos máis simples” informou o edil nacionalista.
