O BNG presentará no vindeiro pleno municipal unha proposición para que o Concello de Lugo poña en funcionamento unha aplicación para teléfonos móbiles de cara a que as persoas xordas se poidan poñer en contacto cos servizos de bombeiros e policía local, en caso de emerxencia de forma totalmente independente,.
Segundo o voceiro da formación, Rubén Arroxo, trátase dunha demanda existente neste colectivo e que avanzaría na inclusión no concello. “A día de hoxe as persoas xordas non se poden comunicar cos servizos de bombeiros e policía local en caso de emerxencia, esta fórmula sería a solución” afirmou Arroxo.
Dende o grupo nacionalista aseguran que non existe ningunha complicación técnica para levalo a cabo, dado que se están a aplicar noutros concellos do estado. “Exemplos como Syspol092 ou SOR-POL, por citar algúns, son apps creadas nos concellos de Elche e Fuenlabrada, respectivamente, e que amosan a viabilidade deste proxecto”, explicou o portavoz do BNG.
