O Grupo Municipal do BNG defenderá, no vindeiro pleno municipal, unha proposición para instar ao goberno do estado a nacionalizar a planta de Alcoa en San Cibrao “para manter os postos de traballo da pranta da Mariña”, segundo declarou Rubén Arroxo. O portavoz do BNG en Lugo lembrou que “Alcoa ten uns oitocentos postos de traballo en San Cibrao, o que a converte no principal motor económico da comarca da Mariña”.
Rubén Arroxo afirmou que “o maior problema que ameaza a viabilidade da empresa é o alto custo da electricidade, imprescindíbel para a produción nunha planta de aluminio”. Para isto, Rubén Arroxo afirmou que “é urxente que o goberno do estado aprobe unha Tarifa Eléctrica Galega que nos permita ás galegas e galegos beneficiarnos da riqueza enerxética do noso país”. Ao mesmo tempo, Arroxo reclamou “a aprobación do Estatuto da Industria Electrointensiva, que permita que factorías como Alcoa San Cibrao poidan manter a súa actividade produtiva sen perdas económicas, garantindo o futuro da factoría e da comarca da Mariña”.
“O goberno do estado debe intervir a planta de Alcoa para retornala ao ámbito público”, afirmou Rubén Arroxo, que engadiu “a factoría xa foi pública no seu día e nunca debeu ser privatizada”. Para Rubén Arroxo, “esta medida é a única solución ao peche da factoría, asegurando os postos de traballo do principal motor económico da Mariña”. “O marco normativo galego, estatal e europeo non impiden a nacionalización da pranta, polo tanto para esta solución só se precisa de vontade política por parte das administracións públicas”, sentenciou Rubén Arroxo.
