O Concello de Lugo respondeu ás reclamacións formuladas pola Federación de Asociacións Veciñais “Lucus Augusti” sobre o estado do Leiraparking do HULA e pola Asociación de Veciños, Comerciantes e Industriais da Milagrosa en relación coa paralización das obras da rúa Milagrosa.
Sobre o aparcadoiro próximo ao hospital, o Goberno local lembrou que no mes de xullo realizou unha intervención urxente na parcela situada na parte superior do Leiraparking. Segundo explicou, os traballos permitiron consolidar o terreo e deixalo nivelado e transitable.
O Concello indicou que, de maneira paralela, está a preparar unha solución definitiva para as dúas zonas de estacionamento. O proxecto correspondente será presentado nos próximos días.
Esta aclaración prodúcese despois de que a Federación Veciñal valorase positivamente a actuación efectuada na primeira parte do aparcadoiro, pero advertise da persistencia de problemas na zona situada diante da fachada principal do HULA.
A Federación considera que estas deficiencias afectan especialmente ás persoas maiores, aos usuarios con mobilidade reducida e ás familias que acoden ao hospital. Por este motivo, solicita que o conxunto do estacionamento sexa seguro, accesible e plenamente operativo.
Preparativos para continuar as obras da Milagrosa
En relación coa rúa Milagrosa, o Concello asegurou que se está a realizar o acopio dos materiais necesarios para reiniciar os traballos, así como a instalación de casetas e a preparación de distintas unidades de obra.
Poren a Asociación de Veciños, Comerciantes e Industriais da Milagrosa expresou a súa preocupación pola ausencia de actividade visible na zona, malia o anuncio municipal de reanudación realizado o 17 de agosto. A entidade advirte das molestias para a veciñanza e das perdas que, segundo afirma, están a sufrir os establecementos comerciais e hostaleiros polos problemas de acceso e o estado da contorna.
O Goberno municipal lembrou que, por petición dos propios veciños e tras unha reunión mantida o 10 de agosto, acordouse deixar as actuacións de maior impacto para despois das festas do barrio, previstas para a vindeira semana.
Segundo o Concello, esta planificación pretende compatibilizar o desenvolvemento das obras coa celebración das festas e evitar interferencias durante eses días. A previsión municipal continúa sendo que a actuación estea rematada antes de finalizar o ano.
O Goberno local comprometeuse a seguir informando nos próximos días sobre a evolución das dúas actuacións e as solucións previstas tanto para o Leiraparking como para a rúa Milagrosa.
