A área de Cohesión Social, a través do CEI Nodus, e Down Lugo veñen de subscribir un convenio para que persoas con discapacidade intelectual realicen prácticas laborais nos diferentes servizos municipais. A finalidade deste acordo en prol da integración é facilitar a inserción das persoas con diversidade funcional.
“Desde o Concello, como a administración máis próxima á cidadanía, seguimos a impulsar medidas que promovan a igualdade de oportunidades, suprimindo as barreiras que aínda existen e nos limitan en moitos ámbitos da vida. Sen dúbida, este labor debe involucrar a toda a sociedade, e de forma particular ao noso rico tecido asociativo que fai un gran traballo neste eido, mais como responsables públicos temos o compromiso de propoñer as solucións e as liñas xerais de acción máis axeitadas para acadar este obxectivo”, sinalou a responsable de Cohesión Social, Ana González Abelleira.
Froito desta colaboración, que estará en vigor como mínimo ata o ano 2027, no vindeiro mes de setembro dúas persoas desenvolverán a súa actividade profesional nas dependencias municipais. Trátase dun período de natureza formativa que terá unha duración de 120 horas – e durante o cal os participantes estarán titorizados en todo momento – “para favorecer que adquiran experiencia e que obteñan os coñecementos necesarios que lles permitan superar con éxito os procesos de oposición aos que concorren”, abondou a edil.
Nesta mesma liña, o Concello de Lugo coopera tamén con outras entidades, como a Fundación Feafes. Unha relación a través da cal a Institución local posibilitou a inserción laboral de máis de 80 persoas con enfermidades mentais nos últimos anos.
“Estamos convencidos de que este tipo de sinerxías son o camiño correcto para acadar o noso obxectivo de que as persoas pertencentes a colectivos con diversidade funcional poidan ser partícipes de todas as facetas da vida, cos dereitos que nos son inherentes a todas e todos, en iguais condicións que o resto da cidadanía”, sostivo González Abelleira.
