A Casa da Xuventude de Lugo cumpre o vindeiro día 9 de abril unha década de vida. Desde a súa apertura, as instalacións convertéronse nas dependencias de referencia para o desenvolvemento de actividades alternativas para a mocidade máis activa de Lugo de idades comprendidas entre os 14 e 35 anos.
Para conmemorar esa data, o Concello de Lugo, a través da concellaría de Xuventude, que dirixe Ana González Abelleira, desenvolverá unha extensa programación cunha serie de actividades nas que os mozos e mozas lucenses poderán celebrar xuntos esta efeméride, e na que se lle quere dar voz a esa mocidade, “que ten moito que dicir sobre a cidade e a sociedade que construímos entre todos”, sostivo a alcaldesa de Lugo, Lara Méndez.
A rexedora, que hoxe visitou coa edil responsable as melloras desenvolvidas neste mandato nas dependencias da Casa da Xuventude, destacou “a importante labor desenvolvida por todas as persoas que estiveron ao fronte dela todos estes anos, traballo que obriga a estar evolucionando de xeito continuo para chegar á mocidade a través de novas accións e novas tecnoloxías, e incluso de novas linguaxes, porque non son as mesmas inquietudes nin as mesmas necesidades as que teñen agora que as que tiñan hai dez anos”.
A programación do décimo aniversario se desenvolverá durante a fin de semana do 9, 10 e 11 de abril. A concelleira Ana Abelleira sinalou que debido as restricións sanitarias, “non realizaremos actividades multitudinarias, como quixésemos, pero faremos un esforzo importante con pequenas accións presenciais e moitas actividades on line, estando moi presentes tamén nas redes sociais”.
