O Salón de Actos do Pazo de San Marco acolleu onte á tarde o primeiro concerto do ciclo ‘Na casa deles’ co que o cuarteto vocal Son de corda homenaxea os poetas lucenses Manuel María, Álvaro Cunqueiro, Uxío Novoneyra, Lorenzo Varela, Luis Pimentel e Darío Xohan Cabana.
A formación, coas voces de Esperanza Iglesias, Carmen Prendes, Fernando G. Jácome e Antón Castro, contou co acompañamento de Raúl Rodríguez (piano), María Pichín (danza) e Aldara Palmeiro (violín), que interpretaron un repertorio de composicións musicais baseadas en poemas dos escritores mencionados.
Para este proxecto, Son de Corda gravou pezas musicais en diferentes espazos ligados a biografía e á obra dos seis poetas lucenses. As gravacións rexistráronse en curtametraxes realizadas por Manuel Lucas Mariño.
O ciclo continuará con concertos na Casa Museo Uxío Novoneyra -en Parada do Courel- e no Centro Sociocultural de Monterroso o 28 de outubro; na Casa Museo Manuel María en Outeiro de Rei o 18 de novembro e no Auditorio de Mondoñedo o 22 de decembro.
