O Festival de Cine Curto de Ribadeo celebra esta semana a súa quinta edición cun programa que combina proxeccións, música e unha gala de clausura. O certame, organizado pola asociación Areas Movedizas desenvolverase entre o 6 e o 8 de agosto.
A sección competitiva reunirá oito curtametraxes procedentes de Galicia e Asturias, que se exhibirán o venres 7 de agosto, ás 20.00 horas, no Cine de Ribadeo. As obras, de diferentes temáticas e estilos, competirán tanto polo Premio do Xurado Profesional como polo Premio do Público.
A programación abrirase o xoves 6 de agosto, ás 20.00 horas, no parque de San Francisco, cunha sesión ao aire libre na que se proxectarán as curtametraxes gañadoras das catro edicións anteriores: Una historia azul, de Mónica Arnanz; Nena, de Xosé A. Touriñán e Jairo Iglesias; Esto no es Noruega, de Paco Cavero e Alicia Albares; e Monstera, de Diego R. Aballe.
A xornada inaugural completarase cun concerto de O Xoán, o proxecto musical do actor Xoán Fórneas, que exercerá ademais como padriño desta edición do festival. O intérprete foi recoñecido co Premio Mestre Mateo pola súa interpretación de Castelao na película Antes de Nós.
A clausura terá lugar o sábado 8 de agosto, ás 20.00 horas, no Teatro de Ribadeo. Durante a gala entregaranse os premios ás curtametraxes gañadoras e celebrarase un concerto de bandas sonoras a cargo da Coral Polifónica de Ribadeo.
