O Parlamento de Galicia aprobou este mércores unha iniciativa para impulsar a candidatura de Lugo como sede da futura Axencia Estatal de Saúde Pública. A proposta, defendida polo Grupo Popular, contou co respaldo da Cámara e aposta pola colaboración entre as distintas administracións para presentar unha candidatura con garantías.
Lugo conta con experiencia probada en ámbitos como a prevención, os programas de vacinación ou os cribados poboacionais e conta cun ecosistema sanitario e investigador de referencia, un hospital moderno e consolidado, un Centro Integral de Saúde de última xeración e ademais, cun recurso singular e de enorme prestixio como é o Laboratorio de Saúde Pública de Galicia que constitúen o aval para optar á localización desta axencia estatal.
Acordo unánime sobre dependencia
Por outra banda, a Cámara galega deu tamén luz verde por unanimidade a unha iniciativa para incrementar o número de persoas dependentes atendidas en Galicia ata alcanzar as 100.000 con prestacións ou servizos efectivos ao longo deste ano. Segundo os datos expostos durante o debate, a comunidade pechou o primeiro trimestre de 2026 con 93.892 persoas atendidas.
Os dous acordos foron aprobados sen votos en contra, evidenciando un amplo consenso parlamentario tanto no respaldo á candidatura de Lugo para albergar a Axencia Estatal de Saúde Pública como na necesidade de seguir reforzando a atención ás persoas dependentes na comunidade.
