Membros do Goberno local visitaron hoxe o Parque Infantil de Tráfico (PIT), onde nenas e nenos de varios centros de ensino de Lugo están a gozar de sesións de circulación segura, dentro do programa de visitas aos colexios que dende o Parque Infantil de Tráfico se organizan anualmente. “Todos os nenos e nenas que acoden ao Parque recibiron anteriormente unha sesión específica sobre seguridade viaria no seu centro de ensino”, indicou o edil de Educación e Difusión do Coñecemento.
“Dende a concellería de Educación realizamos estas actividades, moi solicitadas polos centros de ensino, e con popularidade entre as nenas e nenos da cidade”, indicou o concelleiro, que agradeceu aos centros de ensino e ao persoal do PIT a súa implicación nestas actividades.
A programación destas xornadas, como as dos cursos de verán, están amplamente consolidadas no calendario das familias e dos centros de ensino lucenses. A concellería de Educación organiza estas xornadas “para que os nenos e nenas adquiran condutas e comportamentos seguros, ben sexa como peóns ou como persoas usuarias de transporte público ou privado”, afirmou o concelleiro de Educación.
