O Partido Popular de Xermade advirte que as luminarias do municipio non funcionan correctamente dende hai máis dun mes e critica que o Concello siga sen ordenar a súa reparación ou substitución. Deste xeito, no Pleno que celebrará a Corporación, os populares preguntarán ao equipo de goberno se están a comunicar á empresa responsable estas incidencias e que previsións manexan para paliar a deficiencias no servizo.
Nos proxectos de subministración e instalación de material eléctrico de iluminación con tecnoloxía LED, a entidade local sacou a concurso e adxudicación este servizo, valorando con elo a mellor oferta económica sen ter apenas en conta outras circunstancias que tamén son imprescindibles para un correcto funcionamento, como é o caso da calidade dos materiais e o servizo posterior ao remate do proxecto.
Na actualidade existe un número elevado de puntos de luz en todo o municipio que deixaron de funcionar e con numerosos fallos tamén no funcionamento. Esta situación, que é perfectamente comprobable, está a xerar moito desconcerto entre a veciñanza, pero a entidade local, segundo destaca Antonio Riveira, “non se ocupa” de encargar a revisión ou cambio, se así fose necesario, dos equipos avariados. Este desentendemento é o que provoca que varias vivendas e núcleos de poboación levan sen alumeado público nas últimas semanas.
O voceiro do PP neste municipio de Terra Chá lamenta que, dado o custo xerado e a situación actual, a solución máis viable técnica e economicamente sería voltar ás anteriores luminarias pola nula rendibilidade das colocadas, a consecuencia da calidade e da funcionalidade dos materiais.
