A ONCE emitirá un cupón especial dedicado ao XXV aniversario do Arde Lucus, coincidindo coa celebración da festa o vindeiro 21 de xuño. A presentación desta edición tivo lugar este martes nun acto no que participaron a alcaldesa de Lugo, Elena Candia; os concelleiros de Turismo e Museos, Agustín Gallego Vigo, e de Cultura e Educación, Javier Vázquez Prado; así como o delegado territorial da ONCE en Galicia, Manuel Martínez Pan, e o director da Axencia da ONCE en Lugo, Francisco Javier Farnés Caminero.
A edición especial estará formada por 5,5 millóns de cupóns distribuídos por toda España, nos que figurará a imaxe da celebración lucense, declarada Festa de Interese Turístico Internacional.
Durante o acto, os responsables da ONCE deron a coñecer as características desta iniciativa, que permitirá difundir a imaxe do Arde Lucus en todo o territorio estatal nun ano no que a festa conmemora o seu vinte e cinco aniversario.
Pola súa banda, a alcaldesa destacou a colaboración da entidade con esta efeméride e subliñou a proxección exterior que supón para a cidade. Tamén puxo en valor a consolidación dunha celebración que, segundo sinalou, naceu da implicación da cidadanía e converteuse nun dos principais referentes culturais e turísticos de Lugo.
O cupón do Sueldazo da Fin de Semana da ONCE correspondente ao 21 de xuño repartirá un premio principal de 300.000 euros ao contado e 5.000 euros mensuais durante vinte anos, ademais doutros premios complementarios de 2.000 euros ao mes durante dez anos.
