A candidata socialista ao Congreso, Margarita Pérez Herraiz, acompañada das Xuventudes Socialistas, denunciou este xoves nun acto reivindicativo na estación de tren de Lugo a precariedade laboral que sofren os mozos galegos.
“Hoxe estamos aquí cos mozos galegos, que queren simbolizar coas maletas e con esta viaxe en tren, as dificultades para atopar traballo na provincia de Lugo. A meirande parte dos nosos rapaces teñen que saír a outros lugares de España, ou mesmo ao estranxeiro, para poder ter expectativas de traballo”, sinalou.
Pérez Herraiz advertiu de que os galegos e os lucenses “non queremos vivir nunha Galicia de emigrantes que envía aos seus fillos a buscarse a vida no estranxeiro; á xeración mellor formada da súa historia. Non queremos unha Galicia que permite a pobreza infantil e unha sociedade na que avanzan as desigualdades até límites insoportábeis”.
Por iso emprazou aos votantes a reverter esta catastrófica situación. “O día 26 de xuño, temos que dar unha lección de democracia votando ao PSOE, porque somos e seguiremos sendo a verdadeira esquerda deste pais”, subliñou.
