O Concello de Lugo executará durante as noites do 15, 16 e 17 de xuño os traballos de aglomerado e pavimentación da explanada situada diante da nova Estación Intermodal, unha actuación coa que se pretende completar a urbanización da contorna.
As obras afectarán á Praza Conde Fontao e ás rúas San Eufrasio, Castelao e Montero Ríos. Segundo informou o Goberno local, será necesario establecer cortes totais de tráfico entre as 22.00 e as 7.15 horas durante tres noites consecutivas, a partir do luns 15 de xuño.
A intervención desenvolverase en horario nocturno co obxectivo de reducir a incidencia sobre a circulación habitual e a actividade da zona. O Concello sinala que o aglomerado da explanada debe executarse nunha única actuación continua para garantir a correcta pavimentación da superficie, polo que os traballos non poden realizarse por fases.
Ante esta situación, a administración local recomenda aos condutores utilizar itinerarios alternativos e planificar os desprazamentos con antelación durante as horas nas que permanecerán vixentes as restricións ao tráfico.
O executivo municipal indica que estas actuacións forman parte dos traballos de posta a punto da contorna da nova Estación Intermodal e teñen como finalidade mellorar as condicións de circulación e accesibilidade na zona.
