Axentes do Grupo Nocturno da Policía Local de Lugo, procederon, na madrugada de onte, á detención dun mozo de 24 anos, veciño de Lugo, como presunto autor dun delito de agresión sexual e lesións na persoa dunha moza de 20 anos de idade.
Os feitos ocurriron cando a moza, que se atopaba fronte ao Círculo das Artes, foi agarrada polo agresor fortemente polos brazos, empuxándoa ata o calexón de acceso á Praciña do Colexio, onde intentou besala na boca, forcexeando con ela.
Segundo indica a Policía Local nun comunicado, parece ser que o rapaz chegou a darlle a volta e aplastala co seu corpo contra a parede, tentando violala. Neses intres, tres mulleres achegáronse ata o calexón chamando á atención ao agresor, conseguindo que este abandonara o lugar.
Os axentes, unha vez coñecida a descrición física do agresor, realizaron unha batida pola zona, localizándoo na porta dun local nocturno da rúa Casas Novoa, onde foi detido. Así mesmo, a moza foi trasladada polos axentes ao PAC de Fingoi para a adecuada atención médica mentras que o mozo foi conducido a dependencias policiais onde se instrúen as dilixencias oportunas para o Xulgado de Garda.
