Un deportista tivo que ser evacuado este domingo en helicóptero tras sufrir unha lesión na cadeira mentres practicaba rápel na zona de Rego de Carballido, no municipio de Folgoso do Courel.
O accidente produciuse pouco antes das catro da tarde. As persoas que acompañaban o deportista alertaron o 112 Galicia ao comprobar que a lesión lle impedía camiñar. Dadas as dificultades de acceso ao lugar e a imposibilidade de efectuar a evacuación por terra, activouse un dispositivo de rescate aéreo.
Ata a zona desprazouse persoal do Servizo de Gardacostas de Galicia a bordo do helicóptero Pesca I, que conseguiu recoller o ferido e trasladalo posteriormente ata Vigo, onde recibiu asistencia sanitaria.
No operativo participaron tamén efectivos de Urxencias Sanitarias de Galicia-061, o Grupo de Emerxencias Supramunicipal (GES) de Quiroga, axentes da Garda Civil e voluntarios de Protección Civil de Folgoso do Courel.
A complicada orografía da zona, unida á lesión sufrida polo deportista, fixo inviable a evacuación por medios terrestres e obrigou a recorrer ao rescate aéreo.
