Ribadeo acolle dende hoxe e ata o 17 de novembro unha xuntanza do proxecto europeo de robótica no que participa Apaga (Asociación de Profesores de Automoción de Galicia). Ao encontro asistirán vinte profesores e alumnos chegados de Turquía, Polonia e Italia, que ademais visitarán centros de ensino e empresas e coñecerán a comarca e outras cidades como Lugo, Santiago e Avilés.
O encontro deu comezo esta mañá cunha xornada de traballo no salón de plenos do Concello, onde tivo lugar tamén a recepción oficial ofrecida polo alcalde, Dani Vega, acompañado das concelleiras de Turismo e Atención Cidadá, Marta Saiz e Montse Seijo, así como da xefa territorial de Educación, Sagrario Sánchez.
O rexedor animou aos asistentes a este encontro a aproveitar as xornadas de traballo e tamén a coñecer Ribadeo. Ademias, tres profesores da Escola Municipal de Música e Danza foron os encargados de poñer a nota musical de benvida.
A primeira xornada deste encontro internacional seguiu cunha visita cultural por Ribadeo. Pola tarde os asistentes percorrerán as praias e a ría.
Mañá, martes, viaxarán a Lugo. O mércores visitarán Alcoa, en San Ciprián; o xoves achegaranse a varias empresas en Santiago, e o venres desprazaranse ata Avilés.
