Os feitos ocorreron ao redor das 3:30 horas desta madrugada cando efectivos do Grupo Operativo Nocturno da Policía Local de Lugo e un equipo de Atestados do Corpo trasládanse á Avenida de Madrid xa que se producira un accidente de tráfico.
Á súa chegada observan como un turismo, que circulaba en sentido saída da cidade, cruza unha das glorietas por encima da zona axardinada, derrubando un sinal vertical de tráfico. Postos a falar co seu condutor comproban que presenta signos evidentes de acharse baixo a influencia de bebidas alcohólicas, polo que é sometido ás probas de detección alcohólica arroxando un resultado POSITIVO de 1,02 mg/ l (máis de catro veces a taxa permitida), polo que se instrúen dilixencias por delito contra a seguridade viaria na modalidade de Xuízo Rápido.
O condutor enfróntase a unha pena de prisión de tres a seis meses ou coa de multa de seis a doce meses ou coa de traballos en beneficio da comunidade de trinta e un a noventa días, e, en calquera caso, coa de privación do dereito para conducir vehículos de motor e ciclomotores por tempo superior a un e ata catro anos.
Auxilio á cidadanía
Efectivos do Grupo Operativo Nocturno da Policía Local de Lugo acoden, sobre as 22:20 horas do día 16 de xullo, a unha vivenda da rúa Enebro xa que un home de 71 anos caera no interior do seu domicilio e a súa esposa era incapaz de levantalo.
Os axentes comproban que esta persoa sufrira unha caída desde a súa cadeira de rodas, achándose tirado no chan da habitación, cos pés atrapados na cadeira. Os axentes practícanlle os primeiros auxilios, liberándoo e tranquilizándoo, requirindo a presenza dunha ambulancia do 061, xa que se queixaba de dor na zona lumbar, sendo incorporado e atendido por persoal facultativo e deitándoo na súa cama, sen necesidade de ser trasladado a un centro médico.
