Un home de avanzada idade foi evacuado en ambulancia e sen consciencia por unha posible inhalación de fume. O 112 Galicia tivo constancia desta incidencia quince minutos antes das 21 horas do martes tras a chamada dun dos familiares do afectado, que o atopou inconsciente na súa vivenda de Meixaboi, en Guntín de Pallares.
Ata o lugar trasladáronse os profesionais sanitarios, os Bombeiros de Chantada – que non chegaron a actuar- , o GES de Monterroso e axentes da Garda Civil.
Os membros do GES de Monterroso realizaron as medicións correspondentes e comprobaron que os resultados eran negativos, aínda que a estancia afectada xa estaba ventilada cando chegaron. Deste xeito, explicaron que o home posiblemente inhalara unha importante cantidade de fume dunha cociña de leña que non funcionaba correctamente.