Un incendio orixinado nun restaurante obrigou a desaloxar aos ocupantes dunha vivenda situada no andar superior. Afortunadamente, ninguén resultou gravemente afectado, agás unha persoa que foi atendida no punto sen necesidade de ser trasladada ao Hospital. Segundo a información facilitada polo 112 Galicia, o lume comezou ao fío da unha da tarde de onte na grella do restaurante situado nas proximidades do Palacio de Cristal, en Burela, e foise propagando pola cheminea e as terrazas dos pisos superiores. Os servizos de emerxencias procederon ao desaloxo do primeiro andar mentres duraron as tarefas de extinción.
E ese non foi o único incendio rexistrado onte na provincia de Lugo. En Cospeito, resultou calcinado un garaxe no que se gardaban dous vehículos, madeira e ferramentas. Precisamente, o lume comezou nunha furgoneta, que ardeu nun 70 por cento, e foise estendendo a outro turismo e ao resto de obxectos que había na estancia. Cando os propietarios foron conscientes do incendio correron a retirar o coche, que conseguiron salvar, pero aínda así veuse afectada a defensa.
Foron os propios implicados quen chamaron para pedir axuda cando iban a dar as 14:30 da tarde. Deseguido, o persoal do Centro Integrado de Atención ás Emerxencias de Galicia pasou aviso aos Bombeiros de Vilalba e á Garda Civil.
