A resolución considera que o Sergas non pode trasladar ao facultativo as consecuencias da falta de persoal e de previsión da Administración sanitaria
A praza número 1 da Sección do Contencioso-Administrativo do Tribunal de Instancia de Lugo acordou eximir cautelarmente da realización de gardas médicas a un facultativo de 60 anos, especialista en Otorrinolaringoloxía, mentres se tramita o procedemento xudicial e ata que recaia sentenza firme.
O médico solicitara en 2025 acollerse á exención de gardas prevista no Acordo da Mesa Sectorial de Sanidade de 1998, que recoñece este dereito aos facultativos especialistas das institucións sanitarias de atención especializada maiores de 55 anos. Porén, o Servizo Galego de Saúde (Sergas) rexeitou daquela a petición alegando necesidades do servizo.
O profesional volveu presentar a solicitude en 2026, pero a Administración sanitaria mantivo a súa negativa ao argumentar que existía unha carencia absoluta de persoal da especialidade para asumir esa actividade asistencial no hospital.
No auto, a maxistrada considera que o Sergas non pode facer recaer sobre o facultativo as consecuencias das dificultades organizativas derivadas da falta de persoal. A resolución apunta que a Administración coñecía desde 2025 a intención do especialista de acollerse á exención e que, polo tanto, dispuxo de tempo para adoptar as medidas necesarias para garantir a cobertura do servizo.
A xuíza tamén ten en conta que o médico cumpre os requisitos establecidos para quedar exento das gardas e que a súa realización estaba a repercutir negativamente na súa saúde. Este último extremo estaría acreditado mediante un informe psiquiátrico achegado ao procedemento xudicial.
Con estes argumentos, a maxistrada considera que non resulta razoable que os dereitos e a saúde do profesional se vexan prexudicados para compensar as carencias de persoal da Administración sanitaria. A medida adoptada ten carácter cautelar e manterase vixente durante a tramitación do proceso, sen prexuízo do que determine a futura sentenza firme.
