Unha muller resultou ferida tras declararse un incendio nunha casa do lugar da Fionza, en Cervo, obrigando a trasladala ao hospital de Burela.
O incendio comezou preto das 16.45 horas desta tarde, cando un particular fixo unha chamada ao 112 avisando dun lume que se iniciara no salón da vivenda a causa dunha cheminea. Ata o lugar trasladáronse os Bombeiros de Viveiro, o GES de Cervo, a Garda Civil, axentes da Policía Local, unha ambulancia do 061 e varios membros de Protección Civil de Cervo.
Tras levar a cabo as tarefas de extinción, os bombeiros informaron de que ardera a cheminea por completo, polo que se viron afectadas dúas estancias da planta superior da vivenda, así como todo o teito, do que só quedaron as vigas.
