A sociedade A Senra Infraestructuras, participada por Iberdrola e Naturgy, presentou ante a Confederación Hidrográfica Miño-Sil un proxecto para unha nova central de bombeo na contorna da Ribeira Sacra. A iniciativa contempla un caudal de 75.000 litros por segundo e utilizaría o encoro de Santo Estevo como depósito inferior e o de Edrada-Mao como depósito superior.
O proxecto atópase aínda no trámite de competencia de proxectos e non transcenderon polo momento datos como a localización exacta, a potencia ou as características das conducións e demais infraestruturas.
ADEGA presentou alegacións contra a solicitude, ao considerar que o aproveitamento podería incrementar a presión sobre unhas bacías xa fortemente transformadas pola actividade hidroeléctrica. A organización lembra que Santo Estevo está integrado na Rede Natura 2000 e que ambos os encoros forman parte da Reserva da Biosfera Ribeira Sacra e Serras do Oribio e Courel.
A entidade ecoloxista cuestiona tamén a compatibilidade do proxecto cos obxectivos ambientais da planificación hidrolóxica e solicitou unha concesión polo mesmo caudal, pero destinado a usos ambientais.
Outro dos aspectos sinalados por ADEGA é a duración das concesións actuais: Santo Estevo ata 2051 e Edrada-Mao ata 2053. Segundo a organización, unha nova concesión de ata 75 anos podería implicar manter ambos os encoros operativos ata aproximadamente 2101, cuestión que considera incompatible cos obxectivos de recuperación dos ecosistemas fluviais.
