A cidade de Lugo amencía esta mañá cun novo tira e afrouxa ente o Tenente de Alcalde, Rubén Arroxo, e o presidente da Federación de Veciños de Lugo, Jesús Vázquez. E é que o mandatario lugués acusaba a través das redes sociais a Vázquez de “cacique”, logo de asegurar, tanto Arroxo como o seu edil de Infraestruturas, Alexandre Penas, que o propio presidente da Federación pedíralles, ao inicio do mandato, poder xestionar el mesmo unha parte do orzamento da área dirixida por Penas.
Ante estas duras acusacións, dende Xornal de Lugo, puxémonos en contacto co presidente da Federación de Asociacións de Veciños de Lugo quen asegurou que as acusacións de Arroxo e Penas son “mentira” e aclarou que tan só lles pediu uns orzamentos participativos, como os que xa houbo nalgunha ocasión no propio Concello de Lugo ” e que imos seguir pedindo”.
Vázquez asegura que o que están a facer dende a tenencia de alcaldía é pasar unha “cortina de fume para tapar a súa incompetencia”. “O que fan é a técnica do calamar, botan tinta, cortina de fume; ¿a ver como tapamos isto?“, explicou Vázquez quen asegurou que non se trata dun tema persoal senón que todo vén dado polos problemas co transporte urbano “o bus é desastre, bueno, pois terán que solucionalo que para eso cobran a fin de mes”.
O presidente da Federación de AAVV Lucus Augusti, pediu a Arroxo e o seu equipo que “afronten os problemas” e desligouse de “levar as cousas a un tema persoal que eu non entendo”. Asemade, Vázquez informou, de que ao longo do día de hoxe remitirá un comunicado aos medios para facer chegar, en profundidade a súa opinión ao respecto destas acusacións.
Ago 20, 2021 - 11:11 PM
Sñr. Vázquez, o poder desgasta e vostede xa leva demasiado tempo nesto. E eu penso, e coma min máis xente. De que a estas alturas vostede está por defender máis os seus intereses e politiqueo, que os intereses dos veciños.