Un día máis continúan a aumentar os casos activos por coronavirus na provincia de Lugo. Nas últimas 24 horas o número de afectados elevouse a 64, é dicir, 12 máis que onte, o que sitúa a área sanitaria de Lugo na terceira con máis casos positivos en Galicia, por detrás da área sanitaria de Vigo con 122 casos e A Coruña con 73. En canto ao resto de áreas sanitarias galegas, a Dirección Xeral de Saúde Pública da Consellería de Sanidade informou que os casos activos por Covid-19 son 18 na área de Ourense, 6 na de Pontevedra, 24 na de Santiago, e 10 na de Ferrol. O total de casos en Galicia é de 317.
Do total de pacientes positivos, 4 están en unidades de hospitalización e 313 no domicilio. Non hai pacientes positivos en UCI. Polo de agora, en Galicia hai un total de 10.649 persoas curadas, rexistrándose 619 falecementos.
O número de PCR realizadas é de 188.328.
