O Concello de Lugo reclamaba hoxe por medio de Ana González Abelleira, “avances reais e unha comunicación fluída coa Administración local para que o histórico edificio se converta no futuro Museo da Romanización de Galicia”.
A tenente de alcaldesa, Ana González Abelleira, denunciou “a falta de vontade política da Xunta, que leva máis dunha década adiando un proxecto estratéxico para Lugo e mantendo esquecidas máis de 15.000 pezas arqueolóxicas”.
A concelleira considera “un agravio comparativo que o Executivo de Rueda invista máis de 17 millóns no Pazo de Lourizán mentres en Lugo non se dá un só paso para poñer en valor o cuartel de San Fernando”.
O obxectivo, declaraba a tenente de alcaldesa, Ana González é que este emblemático edificio se converta no futuro Museo da Romanización de Galicia, un proxecto clave para poñer en valor o legado romano de Lugo e consolidar a cidade como capital cultural e patrimonial de Galicia. “Falamos dun proxecto estratéxico, tanto para Lugo como para Galicia, que continúa esquecido pola falta de vontade política do Goberno galego. Os fondos existen, pero seguimos sen ver un só paso adiante e non existe a comunicación necesaria para que o proxecto avance”, subliñou. O Concello recorda que Lugo dispón de máis de 15.000 pezas arqueolóxicas dos períodos altoimperial e baixoimperial, recuperadas nas escavacións realizadas desde os anos noventa, que “permanecen almacenadas sen poder ser divulgadas nin aproveitadas por mor da inacción da Xunta, única administración competente nesta materia. Non é lóxico nin xusto que a capital da romanización galega non conte cun museo para mostrar esta riqueza patrimonial incomparable”, apuntou a edila. González Abelleira puxo tamén en evidencia o agravio comparativo con outros proxectos do país: “O Executivo de Rueda investirá máis de 17 millóns no Pazo de Lourizán, en Pontevedra, mentres en Lugo seguimos agardando a que se execute un investimento que é a todas luces insuficiente que só representa 2,9% do orzamento para o pazo pontevedrés. Isto demostra a discriminación que sofren os e as lucenses”. “É hora de que se cumpra o orzamentado, sen polemizar con cada asunto que incumbe a amabas administracións que se respecte a Lugo e que se dea un paso firme para facer realidade o Museo da Romanización de Galicia. É unha cuestión de xustiza histórica e de equidade territorial”, concluíu González Abelleira.
