A concelleira de Lugo María Reigosa presentou este luns a súa renuncia a formar parte do goberno local e solicitou pasar a ser edil non adscrita. Reigosa accedeu á corporación en outubro tras o falecemento de Pablo Permuy.
Con esta decisión, o executivo municipal formado por PSOE e BNG queda en minoría, con doce concelleiros, fronte aos doce do PP e a acta da propia Reigosa, que pasa a ser determinante nas votacións.
A edil formalizou a súa decisión mediante rexistro municipal. Segundo indicou, apoiará os orzamentos do Concello, cuxa aprobación definitiva está prevista nun pleno esta semana, aínda que non se confirmou se a súa saída do goberno será efectiva antes desa sesión.
Nas últimas semanas xa se evidenciara un afastamento entre Reigosa e o resto do executivo, ao desmarcarse en varias votacións e coincidir co voto da oposición en distintos asuntos municipais.
A situación supón un cambio no equilibrio político do Concello, que pasa a depender do posicionamento da concelleira non adscrita para sacar adiante as iniciativas do goberno.
Foto: Galicia Dixital.
