A alcaldesa de Lugo, Elena Candia, mantivo esta mañá as primeiras reunións de traballo cos representantes do comité de empresa e da xunta de persoal do Concello de Lugo, nunha toma de contacto orientada a establecer canles de diálogo estables coa representación dos traballadores municipais.
Nos encontros participaron delegados sindicais de CC.OO, UGT, USO e CIG no caso do comité de empresa, así como membros da xunta de persoal pertencentes a distintas organizacións sindicais, entre elas CSIF, Unión Sindical de Bomberos, CC.OO, UGT, USO e CIG.
Durante as xuntanzas, a rexedora trasladou a súa intención de manter unha relación baseada “no diálogo, na escoita e na colaboración permanente” co persoal municipal e cos seus representantes sindicais. Candia destacou ademais o papel que desempeñan os empregados públicos no funcionamento diario da administración local, asegurando que constitúen “unha peza fundamental para mellorar o funcionamento do Concello e a atención á veciñanza”.
A alcaldesa tamén puxo en valor o labor desenvolvido polos traballadores municipais en distintos servizos e departamentos, especialmente naqueles que, segundo indicou, levan anos asumindo unha elevada carga de traballo. Neste contexto, sinalou a necesidade de avanzar nunha mellor organización interna e na planificación das necesidades de persoal máis urxentes.
As reunións serviron igualmente para coñecer as principais demandas trasladadas polos representantes sindicais. Segundo explicou o goberno local, no caso do comité de empresa acordouse celebrar previamente unha reunión interna para concretar prioridades e identificar aquelas cuestións que poidan abordarse nos próximos meses.
Pola súa parte, desde a xunta de persoal trasladouse a urxencia de avanzar en asuntos como a carreira profesional do persoal municipal e a modificación da Relación de Postos de Traballo (RPT), dous dos asuntos recorrentes nas reivindicacións sindicais dos últimos anos.
Co obxectivo de continuar o diálogo iniciado nesta primeira toma de contacto, a alcaldesa emprazou aos representantes dos traballadores a participar a vindeira semana nunha nova mesa de traballo na que se afondará nas distintas demandas formuladas.
Candia concluíu subliñando que “un Concello que funciona mellor por dentro pode prestar mellores servizos aos lucenses”, incidindo na importancia de reforzar a coordinación interna e mellorar os recursos humanos da administración municipal.
