O Concello de Lugo prevé iniciar a finais deste mes as obras de humanización e mellora do confort climático da Praza de San Lourenzo, unha actuación adxudicada á empresa NOVAVIAL por un importe de 419.700,93 euros. Os traballos contan cun cofinanciamento do 60 % con fondos europeos FEDER e terán un prazo máximo de execución de oito meses.
O Concello mantivo unha reunión coa empresa adxudicataria para coordinar a planificación dos traballos e analizar as posibles afeccións á veciñanza, especialmente no relativo á circulación e aos accesos aos garaxes.
Antes do inicio da intervención, está prevista unha reunión informativa coas persoas residentes na contorna o mércores 25 de novembro, ás 18.00 horas, na propia praza. Nela explicaranse as distintas fases da obra, o calendario de execución e o plan de tráfico, ademais de atender as dúbidas da veciñanza.
Na planificación tamén se abordou a presenza dunha colonia felina nunha parcela próxima á zona de actuación, co obxectivo de establecer medidas de protección durante o desenvolvemento das obras.






