A sección segunda da Audiencia Provincial de Lugo absolveu, por falta de probas, a dous acusados de agredir sexualmente no domicilio dun deles a dous mozas ás que coñeceron en 2021 nunha discoteca de Viveiro. O tribunal conclúe que a proba practicada “non apunta, sen ningún xénero de dúbidas, ao desenvolvemento dos feitos descritos polas acusacións, que implicarían un delito contra a liberdade sexual”. Os maxistrados fan referencia á “escasa contundencia do relato levado a cabo polas dúas denunciantes, que carece de elementos periféricos que poidan apontoar o manifestado por elas”.
A Sala acolle que non son suficientes para concluír “que poidan soster un pronunciamento condenatorio, pois o argumentario que defenden os procesados é igualmente sostible, polo que, sen acreditar plenamente a inocencia, introduce a dúbida que obriga a absolver”. Polo exposto, e en virtude do principio de presunción de inocencia, a Audiencia Provincial decretou a absolución dos dous sospeitosos. A resolución non é firme, pois cabe presentar recurso ante o Tribunal Superior de Xustiza de Galicia (TSXG).
