A sección segunda da Audiencia Provincial de Lugo absolve a un acusado dos delitos de abuso sexual, agresión sexual e malos tratos habituais. O tribunal, tras analizar as probas, conclúe que o testemuño da denunciante presenta inconsistencias significativas, polo que non logra superar os criterios de credibilidade necesarios para desvirtuar a presunción de inocencia do acusado.
A sala explica que, a pesar de que a denunciante manifestara ser vítima de agresións sexuais en varias ocasións, o seu relato variou “substancialmente” en “aspectos de carácter substancial ou nuclear”, o que xera dúbidas sobre a veracidade das súas afirmacións. Ademais, os maxistrados consideran que non se achegou proba suficiente que apoie as acusacións de malos tratos habituais.
Na sentenza, o tribunal lembra que recae sobre a parte acusadora “a responsabilidade de demostrar a culpabilidade”. No fallo, explica que non quere dicir “que falte á verdade no seu relato”, senón que aprecia que a proba “non tivo a consistencia suficiente para alcanzar a certeza, máis aló de toda dúbida razoable, de que o procesado levase a cabo as accións polas que vén sendo acusado”.
A sentenza non é firme, pois é susceptible de recurso de apelación ante o TSXG.
