A celebración da II Carreira Solidaria Aspnais–Holi Run provocará este sábado, 12 de setembro, cortes de tráfico e restricións de estacionamento en varias rúas do centro de Lugo.
A proba sairá ás 18.30 horas das instalacións do Centro Aspnais e terá unha duración aproximada de 55 minutos. Para garantir a seguridade das persoas participantes e do público, o Concello aplicará cortes de circulación ao longo do percorrido entre as 18.20 e as 19.45 horas.
O circuíto discorrerá pola rúa Santiago, Ronda da Muralla, Porta de Santiago, Bo Xesús, praza de Santa María, Praza Maior, rúa Bispo Aguirre, rúa Vilalba, avenida Rodríguez Mourelo, praza de Avilés e o interior do parque de Rosalía de Castro. A continuación, pasará polo acceso a Pascual Veiga, a baixada da Rampa e a rúa Frei Plácido Rei Lemos.
A Policía Local e a organización restablecerán o tráfico de maneira progresiva unha vez que a última persoa participante da segunda volta acceda ao parque de Rosalía.
Prohibicións de estacionamento
As restricións de aparcamento estarán vixentes entre as 16.00 e as 20.30 horas. Durante ese período non se poderá estacionar en ambas as marxes da rúa Frei Plácido Rei Lemos, nas prazas da praza de Avilés próximas á entrada do parque de Rosalía nin na marxe dereita da avenida Rodríguez Mourelo, segundo o sentido actual da circulación.
A organización colocará carteis informativos nos vaos e nas zonas afectadas cunha antelación mínima de dous días.
Zona para drons na Praza Maior
Con motivo da cobertura da proba, habilitarase tamén unha zona acoutada e valada na Praza Maior, xunto á entrada do pasadizo do xadrez, destinada ao despegue e aterraxe de drons. Este espazo estará operativo a partir das 17.00 horas.
O Concello recomenda planificar con antelación os desprazamentos durante a tarde do sábado, respectar a sinalización provisional e seguir as indicacións da Policía Local e do persoal da organización.
