O IES de Becerreá concluíu o proxecto “Tamén en Galego”, unha iniciativa desenvolvida ao longo dos dous últimos cursos co obxectivo de promover o uso do galego nas administracións e nos establecementos do municipio lucense. O peche da actividade coincidiu coa entrega do Premio á Lingua e á Cultura 2026 ao sector da hostalaría da localidade.
No acto participou o director xeral de Centros e Recursos Humanos da Consellería de Educación, Ciencia, Universidades e Formación Profesional, Jesús Álvarez, quen destacou a combinación de aprendizaxe competencial, compromiso social e dinamización lingüística que, segundo indicou, caracteriza este tipo de iniciativas. Tamén agradeceu a colaboración do tecido empresarial e das autoridades locais.
Na primeira fase do proxecto, o alumnado realizou un diagnóstico sobre a presenza do galego en diferentes ámbitos da vila. Como resultado deste traballo elaborouse un podcast divulgativo, difundido a través das canles do centro educativo e das redes sociais.
Durante o presente curso, a iniciativa centrouse na posta en marcha de actuacións destinadas a incrementar a presenza da lingua galega na contorna. Entre as medidas desenvolvidas figuran a elaboración e tradución de materiais comerciais, o deseño de carteis normalizadores e a creación de modelos documentais adaptados ao uso do galego.
O Premio á Lingua e á Cultura 2026 foi concedido ao sector da hostalaría de Becerreá como colofón dun proxecto impulsado polo instituto coa participación de distintos axentes da localidade.
