O PP celebrou esta tarde o mitin central da campaña das eleccións municipais do vindeiro domingo día 28. Nun pavillón ateigado de militantes e simpatizantes que arrouparon á candidata á alcaldía Elena Candia, onde o presidente da Xunta, Alfonso Rueda, subiu ao estrado para proclamar que “a próxima alcaldesa de Lugo será Elena Candia”.
Na súa alocución Candia criticou sen paliativos a política do goberno municipal referíndose a dous dos proxectos de Psoe e Bng que están sendo moi contestados pola veciñanza de Lugo, o carril bici e as peonalizacións. A este respecto Candia dixo “que semella unha pugna a ver quen peonaliza máis”.
Para Candia o goberno municipal mantén “a Lugo nunha realidade inventada que non se corresponde para nada coas prioridades da xente” e criticou que o actual goberno falaba de transformar Lugo pero para alcaldable do PP “transformación é a que fixo a Xunta no barrio da Residencia”.
Sinalou tamén que quere “un Lugo motor da provincia” e que “a partir do día 29, e en tres meses haberá unha resposta para as empresas, autónomos ou particulares que levan tempo agardando por unha licenza municipal”.
Para rematar pediu “un último esforzo aos afiliados e simpatizantes para que o 28 de maio os populares acaden á alcaldía”.
