As obras de mellora no tramo final da estrada que une A Pontenova e Ribeira de Piquín xa están en marcha. A actuación, executada pola empresa Ovisa céntrase nun treito de aproximadamente tres quilómetros que discorre paralelo ao río Eo, entre a parroquia de Santalla e Ponte Soutelo, na comarca da Montaña Luguesa.
Os traballos iniciáronse coa reapertura de cunetas para mellorar a drenaxe da vía e continuarán coa construción dunha escollera destinada a reforzar a estabilidade do terreo. Ademais, o proxecto inclúe a pavimentación con aglomerado en quente e a renovación completa da sinalización horizontal e vertical.
Esta actuación supón unha mellora significativa para a seguridade viaria e para a conectividade entre as comarcas da Mariña e da Montaña. A estrada desempeña un papel fundamental na comunicación entre as parroquias situadas no val do Eo, unha contorna de gran valor natural e paisaxístico que verá reforzadas as súas infraestruturas de comunicación.
