MariñaPatrimonio e ACIA Burela, coa colaboración do Concello de Burela, organizan mañá a conferencia sobre a cultura castrexa, que contará coa intervención do arqueólogo Eduardo Ramíl Rego, director do Museo Arqueolóxico de Vilalba.
Con este acto, pensado como anticipo á cuarta edición da Festa Castrexa que se celebrará no mes de xullo, preténdese facilitar ao público información sobre os costumes e aparencia dos castrexos, para que participantes, membros dos clans e todo aquel que queira achegarse, conten con datos e detalles da man dun experto, que se centrará de maneira especial na indumentaria dos homes e mulleres que habitaban os castros.
A conferencia terá lugar mañá ás oito e media da tarde na Sala de Conferencias (antiga biblioteca) de Burela.
